विराटनगर, २७ भदौ । विराटनगर महानगरपालिकाले असोज पहिलो सातादेखि विद्यालय सञ्चालन गर्नसक्ने गरी आन्तरिक तयारी सुरु गरेको छ ।
महानगरको शैक्षिक प्रशासन महाशाखाले असोज महिनाको प्रारम्भबाट कक्षा ४ भन्दा माथि आलोपालो प्रणालीमा आंशिक रूपमा विद्यालय सञ्चालन गर्ने तयारी गरेको महानगरका शिक्षा शाखा अधिृकत कृष्ण भट्टराईले जानकारी दिए ।
महाशाखाले सबै सामुदायिक विद्यालयहरूलाई परिपत्र गर्दै विद्यालय सञ्चालनको वातावरण तयार पार्न पूर्वतयारीस्वरुप विद्यालय व्यवस्थापन समिति, शिक्षक अभिभावकहरूसँग छलफल, अन्तर्क्रिया गरी कार्ययोजना तयार पार्न निर्देशन गरेको छ ।
महानगरले कोभिड १९ को विषम परिस्थितिलाई मध्यनजर गर्दै विद्यालय तहको शैक्षिक सत्र २०७८ सञ्चालनका सम्बन्धमा शिक्षा समितिले गरेको निर्णयका आधारमा यस्तो परिपत्र जारी गरेको हो ।
परिपत्रमा विद्यालय प्रशासन पूर्णरूपमा खुला गर्न र दैनिक प्रशासन सम्बन्धी काम जारी राख्न भनिएको छ । यस्तै सबै शिक्षकलाई अनिवार्य विद्यालय पुगी विद्यार्थी सिकाइ सहजीकरण निर्देशिका २०७७ ले तोकेको विद्यार्थी भौतिक रूपमा नियमित उपस्थिति र पठनपाठन बाहेकका क्रियाकलाप सञ्चालन गर्न, अनलाइन कक्षालाई निरन्तरता दिन, छुट विद्यार्थी भर्ना गर्न, शैक्षिक तथ्यांक अद्यावधिक गर्न पनि निर्देशन गरेको छ ।
महाशाखाले भदौ मसान्तभित्रै नगर शिक्षा समितिको बैठक बसेर विद्यालय सञ्चालन तथा व्यवस्थापन सम्बन्धमा थप निर्णय गर्ने पनि जनाएको छ । कक्षा ४ देखि तलका विद्यार्थीहरुलाई भने घरबाटै पठन पाठन गर्नुपर्ने छ ।
